پرۆژەكان

ڕوونکردنەوەی ساسان عەونی وەزیری شارەوانی و گەشتوگوزار لەبارەی خزمەتگوزارییەکانی 8ی حەسارۆک

ڕوونکردنەوەی ساسان عەونی وەزیری شارەوانی و گەشتوگوزار لەبارەی خزمەتگوزارییەکانی 8ی حەسارۆک

وەزیری شارەوانی و گەشتوگوزاری حكوومەتی هەرێمی كوردستان سەبارەت بە گەیاندنی خزمەتگوزاری بۆ گەڕەكی 8ی حەسارۆك لە شاری هەولێر روونكردنەوە دەدات و دەڵێ حكوومەت دەتوانێت خزمەتگوزاری بۆ ئەو گەڕەكە ببات، ئاماژە بەوەش دەكات بە تەواوبوونی پڕۆژەی هێڵی تازەی ئیفراز لەو شوێنە کێشەکە چارەسەر دەبێت، گرفتی سەرەكی ئەو گەڕەكە نەبوونی ئاوە كە لە رێی بیرەوە ناتواندرێت ئاو بۆ هاووڵاتییانی شوێنەكە دابین بكرێت.

ساسان عەونی وەزیری شارەوانی و گەشتوگوزاری حكوومەتی هەرێمی كوردستان سەبارەت بە گەیاندنی خزمەتگوزاری بۆ گەڕەكی 8ی حەسارۆك لە شاری هەولێر، رایگەیاند: بابەتی خزمەتگوزاری لەو گەڕەكە، ئەگەرچی لە رووی كارگێڕی و هونەرییەوە راستەوخۆ پێوەندی بە سەرۆكایەتیی شارەوانیی هەولێرەوە هەیە، گوتیشی: حكوومەت دەتوانێت خزمەتگوزاری بۆ 8ی حەسارۆك ببات، بەڵام گرفتی سەرەكی لەو گەڕەكە نەبوونی ئاوە و هەر جۆرە خزمەتگوزارییەكی دیكە ببەیتە ئەو شوێنە، ناكرێ دانیشتووان خانووی لێ دروست بكەن، ئەگەر خزمەتگوزاری ئاوی تێدا نەبێت.

دەربارەی گرفتی ئاویش لە 8ی حەسارۆك، ساسان عەونی وەزیری شارەوانی و گەشتوگوار رایگەیاند: گەڕەكی 8ی حەسارۆك هەزاران پارچە زەوییە و شوێنێكی بەرزیشە، لێدانی بیری ئاو چارەسەری گرفتی ئاوی ئەو شوێنە ناكات كە قووڵایی بیرەكانمان لە هەندێ شوێن بووەتە زیاتر لە 450 مەتر و ئەو شوێنەش چەندان بیری دەوێت و ناشكرێ لە پڕۆژەكانی دیكەی ئاو راستەوخۆ بۆی ببرێت، بەڵام چارەسەركردنە ریشەییەكەی بە جێبەجێكردنی هێڵی تازەی ئیفراز دەبێت كە ئێستا لە بەرنامەدایە و بەشێكیشی كەوتووەتە بواری جێبەجێكردنەوە، بە تەواوبوونی ئەو پرۆژەیەی هێڵی تازەی ئیفرازیش گرفتی ئاو لە 8ی حەسارۆك بە شێوەیەكی تایبەت و بە گشتیش گرفتی كەمئاوی لە شاری هەولێر نامێنێت.

سەبارەت بە گەیاندنی خزمەتگوزارییەكانی دیكە بۆ ئەو گەڕەكە، ساسان عەونی وەزیری شارەوانی و گەشتوگوزار رایگەیاند: پێشتریش بڕیاری ئەوە هەبووە خزمەتگوزارییەكانی حكوومەت بگاتە هەموو شوێنێك و 8ی حەسارۆكیش دەكەوێتە ناو جەرگەی شاری هەولێر و لۆژیكی نییە كە حكوومەت پلانی بۆ گەیاندنی خزمەتگوزاری بۆ ئەو شوێنە نەبێت! بەڵام گرنگترین بەشی خزمەتگوزاری دابینكردنی ئاوی خواردنەوەیە، چونكە خەڵكی رەنگە بتوانن بەبێ كارەبا و هەندێ خزمەتگوزاری دیكە بژین، بەڵام بەبێ ئاو نە لە هاوین نە لە زستاندا ناتوانن بژین.

وەزیری شارەوانی و گەشتوگوزاری حكوومەتی هەرێمی كوردستان تەئكیدی كردەوە كە ئەو گرفتە لە رێی هێڵی تازەی ئیفراز چارەسەر دەكرێت و بە تەواوبوونی ئەو هێڵە ئاو بۆ هەشتی حەسارۆك دابین دەكرێت و گرفتی كەمئاویش لە شاری هەولێر نامێتێت.
راگەیاندنی وەزارەتی شارەوانی و گەشتوگوزار