چـالاکی

وەزیری شارەوانی و گەشتوگوزار تاقیگەی ئاوی هەولێری بەسەركردەوە


ئاوی هەولێر خاوێنە
وەزیری شارەوانی و گەشتوگوزار تاقیگەی ئاوی هەولێری بەسەركردەوە

بەمەبەستی بەدواداچوون و زانینی كوالێتی ئاوی هەولێر بە تایبەتی كە ئێستا ڤایرۆسی كۆرۆنا بووەتە مەترسی و ئەگەری بڵاوبوونەوەی لە رێگەی هۆكارە جیاوازەكانەوە هەیە، ئەمڕۆ یەكشەممە 8ی ئاداری 2020 ساسان عەونی وەزیری شارەوانی و گەشتوگوزاری حكوومەتی هەرێمی كوردستان بەشێوەیەكی مەیدانی سەردانی بەشی تاقیگەی سەر بە بەڕێوەبەرایەتیی ئاوی هەولێری كرد، بۆ لە نزیكەوە ئاگاداربوون لە كاروبارەكانیان و خۆئامادەكردن بە مەبەستی گرتنەبەری رێكاری پێویست بۆ رووبەڕووبوونەوەی ڤایرۆسی كۆرۆنا بەهۆی ئەوەی ئاو دەچێتە هەر ماڵێكەوە.
لەو بەسەركردنەوەیەدا وەزیری شارەوانی و گەشتوگوزار سەردانی ژوورەكانی تاقیگە و وەرشەی كرد و بە وردی بەدواداچوونی كرد، كارمەندانی بەشی تاقیكردنەوە جەختیان كردەوە بۆ رووبەڕووبوونەوەی پەتای كۆرۆنا بەكارهێنانی كلۆریان بەشێوەیەكی ستاندارد رێكخستووە و تیمەكانیان زیاد كردووە، وێڕای ئەوەش دڵنیایی تەواویاندایە وەزیری شارەوانی و گەشتوگوزار كە ئاوی هەولێر هیچ كێشەیەكی نییە و بەردەوام پشكنینی بایۆلۆجی و پشكنینی كیمیایی بۆ ئاوی بیرەكان و ئاوی ئیفراز دەكەن بە تایبەتی لە ئێستادا بەهۆی مەترسی زیاتر بڵاوبوونەوەی ڤایرۆسی كۆرۆنا جۆرەكانی پشكنینەكانیان زیادتر كردووە، وەك پشكنینی بایۆلۆجی و كیمیایی، پشكنینی بایۆلۆجی بۆ دەستنیشانكردن و دۆزینەوەی بەكتیرایە لە ئاوی ماڵان، ئەوەش دوای ئەوەی نموونەی ئاو لە تۆڕەكانی دابەشكردن وەردەگیرێت و لە دەزگایەكی تایبەتدا پشكنینی بۆ دەكرێت، لە ئێستاشدا ئەو پشكنینە زیاتر و وردتر دەكرێت وەك ئامادەكارییەك بۆ رووبەڕووبوونەوەی كۆرۆنا، كارمەندانی تاقیگەكە جەختیشیان لە خاوێنی ئاوی هەولێر كردەوە.
وەزیری شارەوەنی و گەشتوگوزار وێڕای دەستخۆشی لە فەرمانبەرانی تاقیگەكە، جەختی كردەوە لەسەر ئەوەی پێویستە لە ئێستادا وردتر و جدیتر كار بكەن بە تایبەتی كە ڤایرۆسی كۆرۆنا بووەتە مەترسی، بۆیە دەبێ باشترین كوالێتی ئاو بۆ هاووڵاتییان دابین بكرێت و هەموو جۆرە ئامادەییەكیشی دەربڕی بۆ هاوكاریكردنیان و ئەوەی پێویست بێت دەیگرنە بەر لەپێناو پێشكەشكردنی ئاو بە باشترین كوالێت بۆ هاووڵاتییان.