چـالاکی

وەزیری شارەوانی و گەشتوگوزار پێشوازی لە شاندێكی ئەفسەرانی پۆلیسی شارەوانیی هەولێر كرد


وەزیری شارەوانی و گەشتوگوزار پێشوازی لە شاندێكی ئەفسەرانی پۆلیسی شارەوانیی هەولێر كرد

ئەمڕۆ سێشەممە 26ی نۆڤەمبەری 2019 لە دیوانی وەزارەتی شارەوانی و گەشتوگوزار، بەڕێز ساسان عەونی وەزیری شارەوانی و گەشتوگوزاری حكوومەتی هەرێمی كوردستان بەمەبەستی بەدواداچوونی كارەكانیان و بۆ لە نزیكەوە ئاگاداربوون، پێشوازیی لە شاندێكی ئەفسەرانی پۆلیسی شارەوانیی هەولێر كرد.

لەمیانەی كۆبوونەوەیەكدا لەگەڵ ئەو شاندەی ئەفسەرانی پۆلیسی شارەوانی، تاوتوێی رۆڵی پۆلیسی شارەوانیی هەولێر و سەرجەم ئەو هێزانەی دیكە كرا كە راستەوخۆ پەیوەندیدارن بە چاودێریكردنی زەوییەكانی حكوومەت بەمەبەستی رێگریكردن لە زێدەڕۆیی بۆ سەر زەوی و شوێنە گشتییەكانی حكوومەت.

بەڕێز ساسان عەونی وەزیری شارەوانی و گەشتوگوزار جەختی كردەوە لەسەر ئەوەی دەبێت پۆلیسی شارەوانی چاوكراوەتر بن و هەموو هەوڵێكی جدیی بدەن بۆ رێگریكردن لەسەر زێدەڕۆیی بۆ سەر زەوییەكانی حكوومەت و بوار نەدەن زێدەڕۆیی بكرێت، هەروەها گوتیشی زەویی حكوومەت نابێت لەلایەن هیچ كەسێكەوە بەبێ رێكار و یاساكانی حكوومەت بۆ بەرژەوەندی تایبەت بەكاربهێندرێن.

لە تەوەرێكی دیكەی كۆبوونەوەكەدا بەڕێز وەزیری شارەوانی و گەشتوگوزار سوپاسگوزاریی خۆی و دامەزراوەكانی سەر بە وەزارەتی شارەوانی و گەشتوگوزاری، بە شاندەكەی پۆلیسی شارەوانیی هەولێر گەیاند لە پای ئەو رۆڵەی هەیانبووە لە رێگریكردن لە زێدەڕۆیی بۆ سەر زەوییەكانی حكوومەت، جەختیشی كردەوە لە پاڵپشتی و پێویستی هەماهەنگی زیاتری لە نێوان دامەزراوەكانی سەر بە وەزارەتی شارەوانی و گەشتوگوزار لەگەڵ لایەنی پەیوەندیدار بەو بوارەوە لە هێزەكانی پۆلیس و ئاسایش و زێرەڤانی بە ئامانجی رێگریكردن لە زێدەڕۆیی بۆ سەر زەوییەكانی حكوومەت.