چـالاکی

ساسان عەونی: پێویستە خزمەتی زیاتری هاووڵاتییان بكرێت

ساسان عەونی: پێویستە خزمەتی زیاتری هاووڵاتییان بكرێت

وەزیری شارەوانی و گەشتوگوزار سەرۆكایەتیی شارەوانیی هەولێری بەسەركردەوە

سەرلەبانی ئەمڕۆ پێنجشەممە 14ی نۆڤەمبەر/ تشرينى دووەمی 2019 بەڕێز ساسان عەونی وەزیری شارەوانی و گەشتوگوزاری حكوومەتی هەرێمی كوردستان سەردانی سەرۆكایەتیی شارەوانیی هەولێری كرد و لەگەڵ سەرۆكی شارەوانی و سەرجەم بەرپرسانی بەشەكانی سەرۆكایەتییەكە كۆبووەوە.

لە كۆبوونەوەكەدا بەڕێز ساسان عەونی وەزیری شارەوانی و گەشتوگوزار بە وردی لە كاروباری سەرۆكایەتییەكە و پڕۆژە خزمەتگوزارییەكانی سنووری شارەوانیی هەولێری كۆڵییەوە، گوتی: كاری شارەوانییەكان بەتەنیا پێشكەشكردنی خزمەتگوزارییەكان نییە كە ئەمە ئەركێكی گرنگە، بەڵكوو كاری شارەوانییەكان بایەخێكی گەورەی نیشتمانی و كولتووریشی هەیە، بە تایبەتی لە رووی جوانكاری شار و پێدانی مۆڵەت بە باڵەخانەكان كە دەبێت رەچاوی سیمای شارستانێتیی شارەكە بكرێت بە جۆرێك هەولێر وەك براندێكی گەشتیاریی و شارستانێتی لە ناوچەكەدا دەربكەوێت و بەهۆیەوە گەشتیارێكی زۆر رووی تێبكەن، بەپێی ئەوەی پایتەختی هەرێمی كوردستانە.

بەڕێز ساسان عەونی، گوتیشی: دەبێت لە كاتی جێبەجێكردنی پڕۆژەكاندا رەچاوی كوالێتی باش و ئاستی بەرزیان بكرێت و ئەولەویەتیش بۆ پڕۆژە گرنگەكان بێت بە جۆرێك زۆرترین هاووڵاتیی لێیان سوودمەند بن، گوتیشی، هاووڵاتییان مافی خۆیانە خزمەتی زیاتریان بكرێت، بە رەچاوكردن و جێبەجێكردنی یاساكانی حكوومەت كارئاسانی لە كاروبارەكانیاندا بكرێت و رۆتین لە دامەزراوەكان كەمبكرێتەوە.

تەوەرێكی دیكەی كۆبوونەوەكە گفتوگۆكردن بوو لەسەر جەنجاڵی شار و دۆزینەوەی میكانیزمی خێرا وەك دروستكردن و نۆژەنكردنەوەی پردی پەڕینەوە و هەروەها هەماهەنگی لەگەڵ لایەنی پەیوەندیدار لە هاتوچۆی شاری هەولێر بۆ چارەسەركردن یان كەمكردنەوەی جەنجاڵی لە ترافیك و شەقامە سەرەكییەكاندا، هەروەها بایەخدانی زیاتر بە زیادكردنی رووبەری سەوزایی لەناو شار و شارۆچكەكان بدرێت. دواتر بەڕێز وەزیری شارەوانی و گەشتوگوزار گوێی لە داواكاری و سەرنجی بەرپرسانی بەشەكان گرت و چەندین تەوەری دیكەیان گفتوگۆكردن كە راستەوخۆ پەیوەندییان بە پرۆژەكان و رووكاری باڵەخانەكان و جدێتی زیاتر و خێرایی لە جێبەجێكردنی پرۆژەكان و هەروەها خزمەتكردنی هاووڵاتییانەوە هەبوو.